• O PP considera “inconcibible” que deixe a medio pintar o local social, coa escusa de que non chegan os cartos para pintalo todo
• Esíxenlle ao rexedor local “seriedade e respecto polos veciños”
• Salientan que deixar a medio pintar un centro social alegando que o orzamento previsto non abonda para pintalo todo é indicativo, cando menos, “dunha absoluta incapacidade de xestión e da máis grande falta de sentido común”

Rodeiro, 8 de marzo de 2010. – O Partido Popular de Rodeiro denuncia a “actuación chapuceira” do Goberno local no centro social de Negrelos e reclámalle que proceda “de maneira urxente” a “reparar a desfeita estética que ocasionou neste edificio, deixándoo a medio pintar”.

O Goberno local iniciou o pintado deste local, pero deixou sen pintar un lateral do edificio e a zona das escaleiras, ademais doutras áreas, o que ocasionou “un lóxico malestar nos veciños que non entenden a actitude do Goberno local”. Os populares consideran “inconcibible” que, como resposta ás queixas dos veciños, o rexedor local acuda novamente á escusa de que non hai cartos para rematar a obra e esíxenlle “seriedade e un mínimo de respecto polos veciños”.

INCAPACIDADE ABSOLUTA
“Ademais de que a escusa de que non hai cartos xa cansa –indican dende o PP–, deixar a medio pintar un centro social alegando que o orzamento previsto non abonda para pintalo todo é indicativo cando menos dunha absoluta incapacidade de xestión e da máis grande falta de sentido común”.

Nesta liña, os populares recórdanlle ao rexedor local que “unha das funcións do equipo de Goberno é planificar os traballos que vai realizar e calcular os custes de cada un”, polo que, “se non é capaz de facer iso nin sequera para unhas obras de pintado, non queremos nin pensar que pasará con asuntos de maior complicación”.
 

• O voceiro popular agradece a dilixencia de Portos de Galicia á hora de abordar un tema que resulta vital para esta localidade
• Tomás Fole arranca o compromiso a Portos de Galicia de estudar todas as propostas que o Concello de Vilagarcía envíe sobre a ubicación do Centro de Saúde en Vilaxoán
• Os populares esixen ao Goberno local “que se deixe de palabrería e comece dunha vez a realizar as xestións e trámites necesarios para dotar ao concello desta infraestrutura”
• Lamentan que, a estas alturas, a rexedora local aínda non teña solicitado nin unha soa entrevista para analizar a viabilidade da construción do centro nas parcelas propostas
• “Non se entende que teña que ser a oposición a que tome a iniciativa e realice xestións que son responsabilidade do Goberno local”, indica Fole

Vilagarcía, 6 de marzo de 2010. – O voceiro do PP en Vilagarcía, Tomás Fole, agradeceu hoxe a “boa acollida e a dispoñibilidade” amosada polo presidente Portos de Galicia a colaborar en todo o posible para que esta localidade poida contar canto antes cun segundo Centro de Saúde.

Fole asegurou que, tras a xuntanza mantida este venres co responsable do organismo autónomo para avaliar a posibilidade de dispor de terreos xunto ao Club de Remo, quedou demostrado que “existen novas vías para a construción do segundo Centro de Saúde, igual de válidos ou incluso mellores que as da Comandancia”.

O PP local valorou a “actitude colaboradora” do presidente de Portos de Galicia que, pese a non ter coñecemento por parte do Goberno local de que se barallan terreos competencia deste organismo para o novo centro, se amosou plenamente disposto a estudar calquera proposta que lle sexa remitida.

• Ana Pastor, María Ramallo e Jesús Pérez Arca preguntarán na Comisión de Fomento pola execución destes traballos
• Os populares esixirán un “compromiso serio” do Ministerio de Fomento coa reparación desta infraestrutura, que resulta de “vital importancia” nas comunicacións da provincia
• Lembran que os desprendementos de terra e os danos na N-541 non son un feito puntual, senón que se viñan producindo de forma reiterada nos últimos anos

Pontevedra, 6 de marzo de 2010. – Os deputados do PP pola provincia de Pontevedra denuncian o “atraso inaceptable” das obras da N-541 ao seu paso polo concello de Cotobade, que seguen sen rematarse oito meses despois de que se producise un gran socavón nesta estrada, fundamental para o citado concello e para a conexión de Pontevedra con todo o  Norte da provincia.

Ante esta situación, os deputados populares no Congreso Ana Pastor, María Ramallo e Jesús Pérez Arca levarán á Comisión de Fomento unha batería de preguntas para “pedir explicacións sobre a lentitude dos traballos e esixir compromiso por parte do Ministerio de Fomento coa reparación desta estrada de vital importancia nas comunicacións da provincia de Pontevedra”.

Os populares lembran que os desprendementos de terra e os danos na N-541 non son un feito puntual, senón que se viñan producindo de forma reiterada nos últimos anos, como os ocorridos en varios puntos de Cotobade en 2006 ou os que aínda seguen sen reparar desde xullo de 2009.
 

• Os populares lamentan as “condicións precarias” nas que se ven obrigados a adestrar os membros do Club de Piragüismo
• Reclama a “mellora urxente” das instalacións do Club de Piragüísmo que, na actualidade, presentan un “lamentable estado de abandono”
• Lamenta que, mentres outras administracións como a Deputación Provincial, amosan interese por dar solución aos problemas deste club, o “alcalde e o seu equipo prefiran manterse á marxe”

Catoira, 6 de marzo de 2010. – O Partido Popular de Catoira denuncia a “falta de implicación” do Goberno local na mellora dos equipamentos deportivos e lamenta que “prefira botar balóns fóra e ignorar as condicións precarias nas que moitos veciños e veciñas deste municipio se ven obrigados a practicar deporte”.

O voceiro do PP, Marcos Coira, considera que unha das obras que debe emprender de “maneira urxente” o Goberno local é a reforma e reparación da sede do Club de Piragüismo, dado que na actualidade se atopa “nun lamentable estado de abandono”.

Marcos Coira incide en que, mentres outras administracións están a amosar interese por dar solución aos problemas deste club e colaboran activamente na organización das súas actividades, “o alcalde e o seu equipo prefiren manterse á marxe”.
Trátase dunha actitude que, segundo o voceiro popular, evidencia “a falta de criterio do equipo de goberno en materia deportiva” que está a obrigar a “clubs deportivos que acadan grandes éxitos e realizan unha gran obra social, a desenvolver as súas actividades en instalacións e medios precarios”.