Figueroa salienta que o Banco de España “refrenda a posición defendida pola Xunta” e polo PP a prol da fusión das caixas e deixa a Caballero “só”

O vicepresidente do PP provincial salienta que a fusión é a mellor opción “para Galicia, para Pontevedra e para Vigo”
Salienta que Ordóñez deixou claro que un SIP é un proceso irreversible que conduce a unha fusión e levaría o centro de decisión das caixas fóra de Galicia
Critica que Caballero poña en risco o poder financeiro de Galicia “por un puñado de votos”

Pontevedra, 27 de xaneiro de 2010. – O vicepresidente provincial do PP en Pontevedra, José Manuel Figueroa, salientou hoxe que “o posicionamento que ten o PP e o presidente da Xunta” en relación á fusión das caixas galegas “quedou refrendado en todo o discurso do gobernador do Banco de España”, co que o alcalde de Vigo queda aínda máis só na súa oposición a esta unión estratéxica de Caixanova e Caixa Galicia.

“O alcalde de Vigo errou porque pretendía politizar este asunto, co único obxectivo de sacar a máxima rendibilidade política, electoral e partidista”, salientou , e criticou que “por un puñado de votos” se poña en perigo a capacidade financeira de Galicia para os próximos anos.

Figueroa fixo fincapé en que a aposta pola fusión non é un capricho do PP ou da Xunta, senón que vén dada “porque desde o Banco de España se está a impulsar unha reestructuración do sistema financeiro español” que obriga á Xunta de Galicia a adoptar unha decisión para evitar que esta Comunidade se quede sen entidades financeiras.

“Todos os datos do Banco de España apuntan a que as caixas non poden seguir en solitario”, afirmou e, por iso, a Galicia só lle quedaban dúas opcións “unha fusión ou un SIP”. Segundo o dirixente popular, o presidente da Xunta e o PP apostan pola fusión, porque é a única vía que garantiría a creación dunha gran entidade financeira, sólida, solvente e netamente galega que, ademais, sería a quinta caixa de España.

“Nós o que queremos –subliñou- é que en Vigo, na provincia de Pontevedra e en Galicia teñamos unha caixa galega e non ter que optar a que os poderes de decisión se tomen fóra de Galicia”.

Esta é a opción “dos que propoñen un SIP”, xa que, segundo lembrou o vicepresidente provincial dos populares, o propio gobernador do Banco de España “dixo claramente que un SIP é irreversible e conduce a unha fusión” que suporía, por unha banda, levar o poder de decisión fóra de Galicia e, por outra, acabaría por converter as caixas en bancos.

MANIPULACIÓN E ENGAÑO
Tendo en conta estes datos, Figueroa criticou que algúns, en referencia ao alcalde de Vigo, se dediquen a “manipular e engañar á opinión pública, propoñendo un SIP, que en realidade sería unha fusión a curto, medio ou longo prazo”.
Figueroa asegurou que a campaña emprendida polo rexedor vigués en contra da fusión, “na que se quedou completamente só”, non responde máis que á súa intención de “sacar a máxima rendibilidade electoral” dun tema de gran transcendencia para Galicia.

Por iso, mostrou o seu desexo de que, tras ter escoitado o pronunciamento do gobernador do Banco de España, “o alcalde de Vigo rectifique e entre no eido do consenso, onde están a maioría das institucións e sectores tanto de Vigo como de Galicia, co obxectivo de poder ter unha caixa galega, forte e competitiva”.

“Desde o PP estamos cada día máis satisfeitos da decisión que adoptou o presidente Feijoo, porque sabemos que a corto e medio prazo é a mellor opción para Galicia, é a mellor opción para Pontevedra e é a mellor opción, por suposto, para Vigo”, concluiu.