O PP de A Illa insta ao Goberno local a colaborar na eliminación de “todos os puntos negros” da Avenida Castelao, incluídos os que eles mesmos crearon

• O voceiro popular, Juan José González, reclama que o Concello “actúe como representante dos veciños e non como sucursal do PSOE”
• Asegura que o modelo de beirarrúas colocado polo Concello ten ocasionado xa “innumerables caídas e accidentes”

A Illa de Arousa, 27 de xaneiro de 2010. – O voceiro municipal e presidente local do PP de A Illa, Juan José González Vázquez, convidou hoxe ao Goberno local “a colaborar na eliminación de todos os puntos negros” da Avenida Castelao e a traballar para mellorar a seguridade viaria desta zona comezando por “prescindir do modelo de beirarrúas que está instalando o concello e que supoñen un serio perigo para viandantes e vehículos”.

O voceiro popular lembra que son “innumerables as caídas e os accidentes” rexistrados no treito que une a nova farmacia co cruce de O Chufre como consecuencia da instalación dese modelo de beirarrúas. “É certo –salientan desde o PP local– que mellorar a seguridade viaria debe ser unha prioridade, e así o defendemos tamén desde o PP, por iso se debe comezar por non crear situacións de perigo desde o propio concello”.

Asegura, ademais, que xa se teñen producido numerosas reclamacións de particulares e de compañías aseguradoras por accidentes neste treito, o que “obrigará ao concello a pagar indemnizacións con cargo ás arcas municipais e, polo tanto, a costa do peto de todos os veciños de A Illa”.