O PP de Rodeiro lamenta que o equipo de Goberno pretenda converter á oposición “en meras comparsas das súas fotos”

• Os populares lémbranlle ao alcalde que “estaremos encantados de ser convidados a actos de inauguración cando antes se nos dea voz na acción de Goberno”
• Convidan ao rexedor local a “escoitar e atender as demandas veciñais coa mesma dilixencia que aplicou á hora de convidalos á inauguración desta tarde”

Rodeiro, 4 de febreiro de 2010. – O PP de Rodeiro lamentou hoxe que o Goberno local “só saiba de nós cando quere que lle fagamos bulto nas súas fotos, pero ignore que existimos nos asuntos realmente importantes, como é a toma de decisións a nivel municipal”. Os populares referíronse así á invitación que o rexedor local lle cursou para asistir a un acto de inauguración en Rodeiro coa presenza do subdelegado do Goberno en Pontevedra, Delfín Fernández, e coa que “o señor Vence nos pretende converter en meras comparsas das súas fotos”, algo ao que aseguraron que non están dispostos.

O PP salienta que esta invitación “entraría dentro da normal cordialidade institucional” entre os distintos membros da corporación municipal, pero neste caso “perde todo o sentido”, debido á actitude habitual do rexedor local, o socialista José Vence, “que continuamente ningunea á oposición e se nega en rotundo a escoitar as nosas propostas”.

“Estaremos encantados de ser convidados a actos de inauguración –salientan– cando antes se nos dea voz na acción de Goberno a través, por exemplo, das xuntas de portavoces que o alcalde se nega a convocar”.