Novas Xeracións insta ao Concello de Redondela a remodelar o Club de Remo de Cesantes

• Tralos graves desperfectos sufridos polo temporal
• O Goberno local comprometeuse cun local de deseño en forma de barco que “finalmente só vimos afundirse no baúl das moitas promesas electorais”

Redondela, 3 de marzo de 2010.- Novas Xeracións do Partido Popular de Redondela amosa a súa solidariedade cos socios do Club de Remo de Cesantes ante os graves desperfectos ocasionados polo temporal que atravesou Galicia a pasada fin de semana.

Dende NN.XX. instan ao Concello "a que se faga cargo das circunstancias dos mozos deste equipo e contribúa a mellorar as instalacxións nas que practican deporte”, explica Laura Alonso, presidenta de NN.XX. Neste senso, Alonso asegura que “non hai dereito de que estean a sufrir as consecuecias dun goberno que moito promete e nada fai”. Lembra que o actual Goberno local de Redondela comprometeuse a dotar a este club dun novo local, "un edificio de deseño en forma de barco que finalmente só o vimos afundirse no baúl das moitas promesas electorais sen cumprir”.

O Club de Remo de Cesantes leva anos reclamando aos responsables municipais unha remodelación das instalacións ou a construción dunha nova sede. O club síntese desprazado, “abandoado á súa sorte nun local sen as máis mínimas condicións de seguridade e sen o espazo suficiente para realizar as súas actividades en igualdade de condicións que outros veciños do noso municipio”, conclúe Alonso.