Figueroa salienta que a renuncia de Touriño “evidencia unha desconfianza absoluta no seu partido e no liderado que ten agora en Galicia”

• O vicepresidente provincial do PP en Pontevedra considera este abandono como “unha mostra palpable da descomposición do PSdeG”
• O dirixente popular deséxalle ao ex presidente da Xunta “o mellor tanto na súa vida profesional como persoal”

Pontevedra, 10 de marzo de 2010. – O vicepresidente provincial do PP en Pontevedra, José Manuel Figueroa, salientou hoxe que a renuncia do ex presidente da Xunta Emilio Pérez Touriño ao seu escano de deputado no Parlamento Galego “evidencia unha desconfianza absoluta no seu partido e no liderado que o socialismo ten agora en Galicia”.

Tras amosar o “máximo respecto” pola decisión do que fora presidente da Xunta de Galicia, Figueroa fixo fincapé en que, desde o punto de vista político, o abandono do seu escano de deputado é un reflexo da “descomposición que ten o PSOE desde que perdeu as eleccións e non renovou a presidencia da Xunta” e supón unha “mostra palpable de que o señor Touriño non se atopa a gusto dentro do socialismo galego que dirixe Pachi Vázquez”.

O líder popular quixo, no entanto, desexarlle o mellor a Pérez Touriño e amosou o “meu máximo respecto para unha persoa que foi presidente da Xunta de Galicia, para ben ou para mal, porque os cidadáns, ao final, póñennos a cada un onde consideran máis oportuno”.