Pontevedra, a provincia máis afectada pola reprogramación de Blanco, aseguran os deputados nacionais do PP

• Os deputados nacionais do PP fixeron unha valoración dos recortes anunciados polo Ministerio de Fomento na provincia de Pontevedra
• A falta de compromiso de Fomento coa AP-9 fai que os pontevedreses teñan que seguir pagando pexe durante moitos anos, afirma Ana Pastor
• “Ao Ministerio de Fomento madúranlle tanto os proxectos que lle caducan no caixón”, asegura Jesús Pérez Arca
• Dolores Pan, critica ao alcalde de Pontevedra, o nacionalista Miguel Anxo Fernández Lores, e á súa socia de goberno, a socialista, Teresa Casal, por non esixir ao Goberno un compromiso firme e unívoco en relación coa circunvalación de Pontevedra
• “Se Caballero cumpre as súas promesas, terá que deixar o seu cargo en breve”, xa que os prazos do AVE, que neste momento se barallan, están moi lonxe dos prazos comprometidos nun primeiro momento”, asegura a deputada, Ana Pastor

Pontevedra, 23 de xullo de 2010.- Os deputados nacionais do PP por Pontevedra, Ana Pastor, María Ramallo e Jesús Pérez Arca compareceron en rolda de prensa xunto coa secretaria provincial, Begoña Estévez, e a senadora, Dolores Pan,  para facer unha valoración dos recortes anunciados por José Blanco, ministro de Fomento, que afectan a obras viarias e ferroviarias da provincia.

A deputada nacional, Ana Pastor, afirma que os recortes anunciados por Fomento afectan de cheo aos intereses da provincia, posto que se inclúen nas 199 obras que o Ministerio afirma que vai a reprogramar, un concepto que os populares non entenden xa que non se dá unha data concreta para a execución destas obras.

Os deputados cren que “a actitude do ministro de Fomento é moi diferente da que amosaba hai tan só catro meses, cando viña a Pontevedra a inaugurar obras que se empezaron na época do PP dicindo que non había crise e gastando as arcas públicas de todos os españois no Plan E”.