O PP de Nigrán xustifica o pleno extraordinario dunha análise tranquila e profunda das propostas do Consello Sectorial

Alberto Valverde asegura que é no pleno onde se deben analizar as propostas do Consello Sectorial para que o equipo redactor as teña en consideración
Alberto Valverde cre que “é neste pleno onde os grupos deben posicionarse nas propostas do Consello Sectorial para remitilas ao equipo redactor”
O PP de Nigrán acusa aos demais grupos por “tratar de certificar a inutilidade do Consello Sectorial ao querer enviar ao equipo redactor as propostas sen pasar polo pleno”
Alberto Valverde afirma que “de non existir un acordo plenario polo medio as propostas do Consello Sectorial non serían tidas en conta”

Nigrán, 28 de Xullo de 2010. – O PP de Nigrán segue pensando que o Plan Xeral é o tema prioritario desta corporación, e a participación dos colectivos debe formalizarse para que realmente o Consello Sectorial non sexa un “paripé” como pretende o goberno municipal. Por isto, faise necesario o pleno extraordinario deste xoves solicitado polo Grupo Popular. Para o PP, a pesar de que os demais grupos non teñen especial interese en analizar as propostas do Consello Sectorial, tal e como se inclúe no regulamento, este debe asesorar e propoñer ao pleno todas aquelas cuestións urbanísticas que considere para que o propio pleno as valore. Segundo Alberto Valverde, a petición e celebración do pleno para tratar de forma exclusiva este tema é porque “o asunto ten a importancia suficiente para facelo e porque ademais desta maneira cumprimos co establecido no regulamento, dándolle participación real aos colectivos que participaron no Consello Sectorial”.

Para o PP de Nigrán esta iniciativa de solicitar un pleno extraordinario e a conseguinte celebración do mesmo este xoves atende a “unha coherencia con todo o feito e dito ata agora, cando desde as filas populares se pedía unha participación real e non de cara á galería do Consello Sectorial, algo que o resto de grupos non fixeron. Queriamos que as propostas do Consello Sectorial pasasen polo pleno e actuamos en consecuencia, e xustificamos a non presenza do PP nas mesas sectoriais baixo o argumento de non politizar eses debates nesas mesas, coa finalidade de que saísen as propostas que os colectivos estimasen oportunas para que despois os grupos políticos as analizasen e desen un planteamento ao respecto, e iso é precisamente o que hoxe estamos facendo e pedindo que se faga”, asegura o voceiro popular.

Polo contrario, o PP asegura que “os demais grupos non eran partidarios deste pleno e de analizar as aportacións do Consello Sectorial por medo político a asumir a responsabilidade que deben asumir e sobre todo porque non cren en absoluto na participación dos colectivos e do Consello Sectorial, polo que pretendían remitir directamente as propostas á empresa redactora co obxectivo de que estas non se tiveran en conta”.